Thuneitute kutah US President hlui Donald Trump inpe

US president hlui, Donald Trump chu 2020 inthlan kaihhnawiha thubuai siamsak a nih chungchangah, Ningani khan Georgia state thuneitute kutah a inpe.

Republican hruaitu hian Ningani khan a chenna Bedminster, New Jersey aṭangin Atlanta, Georgia a pan a, Fulton County Jail thuneitute kutah a inpe a ni. A inpek hnu hian police record turin a thla pawh laksak niin, US President ni tawh zingah mugshot laksak hmasa ber a ni. A mugshot hi amah ngei hian a social media platform-ah a post zui a, a campaign website link a dah tel bawk.

Jail-a minute 20 vel a awm hnuah USD 2,00,000 bond agreement hmangin, Trump hi chhuah leh nghal a ni a. Georgia state pawh a chhuahsan nghal bawk. Airport-a chanchinthar lakhawmtute a kawmnaah, Trump chuan tihsual a nei lo tih sawiin, kum 2020 inthlana a chak loh dan chu khing let turin dikna a nei tih a sawi. "Inthlan dik tawk lo nia kan hriat chuan mi tu pawhin khing let turin dikna kan nei vek a ni," a ti.

Donald Trump hi kum 2020 President thlanna neiha Georgia inthlan result tihdanglam tuma puh chungchangah midang 18 nen thubuai siamsak an ni. Thubuai siamsakte hi an ram huna nimin tlai thleng khan thuneitute kuta inpe tura hun pek an ni a, mi 12 chu an inpe tawh a ni.