Myanmar sipai hotu sawiseltu hip hop artist kum 20 tang dawn

Myanmar court chuan sipai sorkar sawiseltu, hip hop artist Byu Har chu thiam loh chantirin, kum 20 jail tang turin a hrem.

Min Oat Myanmar tia hriat lar, Byu Har hremna hi Nilaini khan tihchhuah a ni a, sipai sorkar sawiseltu celebrity zingah hremna pek nat ber a la ni.

Byu Har hian sipai hotu lu ber, general Min Aung Hlaing leh electric power minister-te na taka a sawisel avangin kumin May 24 khan Yangon-a a chenna in aṭangin man a ni. Facebook page-a a live-naah, Byu Har hian sipai sorkar chuan Yangon khawpui electric mamawh zat pawh a pe thei lo tiin, Gen Min Aung Hlaing chu hruaitu ni tlak lo leh, electricity minister chu mi â tiin a sawi a, Suu Kyi-i kaihhruai sorkar hnuaiah power supply chu a ṭha zawk hle tih a sawi.

Man a nih hnuah state media chuan mipuite fuihpawrh leh, ram boruak tichhe thei zawnga a chet avanga man a nih thu an tarlang a ni.

Myanmar-ah hian power supply a ṭha lo hle a, March leh June inkar khan Yangon khawpuiah chuan power renchemna atan nitin darkar riat chhung supply tihtawp a ni a, tunah erawh chuan darkar li tihtawp a ni tawh thung.

Assistance Association for Political Prisoners in a tarlan danin, kum 2021, February thlaa sipaite'n mipui thlan sorkar paih thla a, thuneihna an chan hnuah ram chhunga buaina chhuakah mi 4,000 chuang an thi tawh a, mi 24,410 man an ni tawh bawk. Sipai sorkar dodalna thlawptu, celebrity-te chu sipai lamin an bitum zui a, eng emaw zat man an ni tawh a ni.