NKorea-in spy satellite kap chhuak hlawhchham leh

North Korea-in orbit-a spy satellite kah chhuah a tum chu a ṭum hnihna atan a hlawhchham leh.

Ningani khan North Korea hian spy satellite hi a kap chhuak leh a, a hma ang bawkin a kah chhuah aṭanga rei lo teah a tla zui leh a ni. Hei hi thla thum chhunga spy satellite a kah chhuah ṭum hnihna a ni.

South Korea Joint Chiefs chuan Ningani zinga North Korea rocket kah chhuah them ṭhenkhat hi Philippines khawchhak lam tuipuiah a tla niin a sawi.

North Korea state media, Korean Central News Agency chuan rocket kah chhuah hi stage 1 leh 2 chu tluang takin kalpui a ni a, mahse, emergency blasting system lamah thil felhlel a awm avangin a third-stage flight-ah a che sual ta niin a tarlang. A fel tawk lohna laite ennawnin, kumin October thla hian a ṭum thumna atan satellite hi kah chhuah leh an tum dawn tih an tarlang nghal bawk.

NKorea ram hotu lu ber, Kim Jong-un chuan an ram chhehvela US sipaite chet dan thlithlai turin orbit-a syp satellite dah a duh thu hi a lo sawi tawh a ni. Hemi hnu hian kumin May 31 khan spy satellite hi a kap chhuak a, mahse, hlawhtling loin Yellow Sea-ah a tla zui a ni. South Korea chuan rocket tla them hi eng emaw zat la khawmin, a zir chiansak nghal a ni.