New Zealand sorkar thar lalut

New Zealand prime minister Jacinda Ardern leh a kaihhruai ṭangrual sorkar thar chu nimin khan lakluh a ni. 

Jacinda Ardern hian tunkar tir lam khan a minister turte hi a ruat fel tawh a, nimin khan Wellington-a Government House-a lakluh a ni a, English leh Maori in rinawmna thu an tiam a ni. 

Kum 40 mi, Prime Minister Ardern chuan an ramin chona tam tak a hma chhawn mek thu sawiin, chung chona hrang hrangte chu an ram mipuite an ṭanrual phawt chuan an hneh theih thu a sawi. Ardern-in cabinet minister atan mi 20 a ruat a, an zingah hian hmeichhia pariat an tel. 

Ardern hian a deputy prime minister atan mahni anpui kawp, Grant Robertson a ruat a, finace a chang zui bawk ang. Ani bakah hian a minister zinga pahnih, Ayesha Verrall leh Kiri Allan-te pawh mahni anpui kawp a ni bawk. Foreign minister, Nanai Mahuta chu Moari hnam niin, a khabe-ah traditional Maori tattoo a nei. India rama piang, Priyanca Radhakhrishnan chu minister thar zingah hian a tel bawk. PM chuan a cabinet minister chu mi chi hrang hrang huam a nih thu sawiin, mi thiam tak tak leh talent nei ṭha tak an ni a, an thiamna avanga ruat a nih thu a sawi. 

New Zealand-ah hian October 17 khan seat 120 awmna, House of Represen­tative inthlanpui neih a ni a, rorellai Labour party chuan seat 65 lain, vote tla aṭangin 50% a hmu phak a ni. Chak tur hian seat 61 hmuh phak a ngai a ni. Indopui II-na hnua Labour party-in party mala sorkarna an siam theihna hmasa ber a ni a, mahse hetichung hian Ardern chuan Green Party thawhpuiin ṭangrual sorkar a din leh a ni. 

Covid-19 hri leng dona kawngah hian PM Ardern leh a kaihhruai sorkar hi a che ṭha hle a, nikuma Christ church-a mosque-a inkhawmte pawng kah an nih hnua an rama silai khapna dan khauh tak a siam zui nghal avang tein an ram mipuite chauh ni loin, ram dangte fak pawh a hlawh hle.