Naktukah Myanmar ram inthlang dawn
Myanmar ram inthlanpui chu naktuk hian neih a ni dawn a, mahse bial ṭhenkhatah erawh chuan security thil avangin inthlan hi neih a ni rih lo ang.
Upper House-a seat 168 leh lower house-a seat 330 atan inthlan hi neih a ni dawn a, inthlan result puan hnuah Parliament in hnihte hian joint session neiin, President thar tur an thlang leh ang.
Tun ṭum inthlanpui neih tur hi kum 2008-a sipai sorkarin an ram danpui a siam ṭhat hnua inthlan buatsaih ṭum thumna tur a ni. Kum 2010 inthlan khan Aung San Suu Syi leh a party, National League for Democracy (NLD) chuan an boycott a, hei vang hian sipai thlawp Union Solidarity and Development Party chuan military general hlui Thein Sein president-na hnuaiah sorkar an siam a ni. Kum 2015 inthlanpuiah erawh NLD chu hneh taka thlan tlin niin civil sorkar a ding ta a ni.
Kumin inthlanah pawh hian rorellai, NLD hi a chet ṭhat hle rin a ni. Mahse sipai sorkar laia danpui siam angin, Parliament in hnihah hian sipaiin member 25% a ruat thei a, hei vang hian NLD hian majority nei tur chuan seat awm zat aṭanga hmun thuma ṭhena hmun hnih tal a lak phak a ngai dawn a ni.
President hnenah hian thuneihna sang tak pek ni mah se, defence leh security lam chu sipai thuneihna hnuaiah a la awm tho a ni. Sipai hian cabinet minister pathum a ruat thei a, ministry pawimawh pathum defence, home affairs leh border affairs te chu sipai kutah a la awm tho a ni. Ram danpui hi siamṭhat a nih dawn chuan lawmaker 75% in an thlawp ngai dawn a, NLD hian hemi chungchang hi Parliament-ah pawh lo sawichhuak tawh ṭhin mah se, sipai ruat lawmaker-ten an hnawlsak zel rih a ni.