Uganda-ah a thlawnin mask sem dawn

Uganda president Yoweri Museveni chuan lockdown sût hmain an rama kum 60 chunglam tan a thlawnin hmaituamna (mask) sem a nih tur thu a sawi.

May thla aṭang khan Uganda-ah hian mask vuah vek tur tiin sorkar chuan thuchhuah a siam a, hei hi bawhzui a nih theih nan sorkar chuan kum 60 chunglamte chu ni 14 chhungin mask hi sem vek a tum a ni. Hemi hnu hian dawr, public transport vehicle, kawngsira eichawp zuarte chu an hna thawh chhunzawm phalsak an ni tawh dawn a,  ramria public transport erawh ni 21 chhung khap a la ni ang. 

Uganda-ah hian March thla tawp lam khan Covid-19 kai hmuh chhuah a ni ve chauh a, hemi hma March 18 khan sorkar chuan khuah­khirhna hrang hrang a lo kalpui lawk a, a hnuah inkharkhipna (lockdown) thlengin a kalpui a ni. Sorkar hmalaknate hi  an ram mipuiin an zawm ṭhat thu President chuan sawiin, hei vang hian an ramah he hri kai hi an tlem thu a sawi. 

Nimin thleng khan Uganda-ah hian hri kai hi mi 248 chauh an la awm a, heng zinga mi 63 chu enkawl dam tawh niin, he hri vanga thi hi an la awm lo.