Zimbabwe President-ah Mnangagwa thlang nawn

Zimbabwe President thar thlanna neih zawh takah, President ṭanglai Emmerson Mnangagwa chu thlan nawn a ni. Hetih lai eptu pawl chuan inthlan result hi an pawm lo tih an sawi thung.

Zimbabwe Electoral Commission (ZEC) chuan inthlanah hian President Mnangagwa hian vote tla aṭangin 52.6 % a hmu a, a khingpui Citizen's Coalition for Change (CCC) hruaitu chuan Nelson Chamisa chuan 44 % a hmu tih a sawi.

ZEC chairwoman Justice Chigumba chuan ZANU-PF party candidate, kum 80 mi Emmerson Mnangagwa chu an ram President ni tura vote hmuh ngai zat, vote tla aṭanga 50% a hmuh tlin avangin tlinga puan a ni tih a sawi a ni.

Mnangagwa hian vote mtd 2.3 chuang a hmu a, Chamisa hian mtd 1.9 a hmu. Inthlan neihah hian vote nei mktd 16 dawn aṭangin 69% in vote an thlak niin ZEC chuan a tarlang.

CCC thupuangtu, Promise Mkwananzi chuan inthlan result hi a dik tawk loh avangin an pawm thei lo tih a sawi a, an hma lak zel dan tur puan thuai a ni ang, a ti.

Kum 2018 inthlanah khan Mnangagwa hian Chamisa hi a lo hneh tawh bawk. Hemi ṭum pawh hian eptute chuan vote chu tihchingpen niin an sawi a, mahse Constitutional Court-in inthlan result hi a pawmsak a ni.

Kum 1980-a British awpna aṭanga zalenna an hmuh hnuah, Zanu-PF hian Zimbabwe rama thuneihna hi chhang chhunzawm zelin, kum 43 chhung sorkarna an siam tawh a ni.