NKorea-in an rama kir a phalsak

North Korea chuan Covid-19 hri leng vanga ramria khuahkhirhna khauh tak a siam hnuah, Inrinni liam ta aṭang khan ram pawn lama awm an ram mi leh sate chu North Korea-ah an kir a phalsak.

KCNA news agency-in a tarlan danin, State Emergency Epidemic Prevention Headquarters chuan Inrinni liam ta khan North Korea mi leh sate an rama an kir theihna tur ruahmanna chu a pawm ta tih a sawi. Mahse an ram kirte hi kar khat chhung quarantine ward-ah dahin, an hriselna dinhmunte enfiah phawt a ni ang.

Kar liam ta khan Beijing aṭangin Air Koryoa flight chu Norea Korea khawpui, Pyongyang -ah a ṭum a, hei hi kum 2020-a hri leng vanga khuahkhirhna a siam hnuah an rama commercial international flight ṭum leh hmasa ber a ni. He thlawhtheihnaa chuangte hi North Korea mi, hri len hnua ramri khar vanga China rama tangkhangte an ni.

International flight luh phal a nih hma hian rel leh lawngte erawh an luh phalsak an lo ni tawh a ni. August thla tir lam khan international competition-a tel tur, North Korean taekwondo athlete leh official-te chu motor-in Beijing panin, heta ṭang hian Kazakhstan-ah thlawhtheihna in an kal leh a ni.