War veteran, kum 100 mi hnenah knight nihna pe

Britain National Health Service tana pound maktaduai 33 dawn (USD mtd 40.5) tuak chhuah saktu, war veteran captain Tom Moore chu knight nihna a pe. 

Prime minister Boris Johnson chuan Captain Tom hi knight nihna pe tur hian rawtin, Queen Elizabeth II chuan a pawmsak a ni. He chawi­mawina hlan a nih avang hian ministry of defence protocol hnuaiah Captain Sir Thomas Moore tih a ni tawh dawn a ni. 

Captain Tom Moore hi a chenna Marston Moretaine, Bedfordshire-a a huanah NHS tana sum tuakin nitin a kal kual ṭhin a, a tirah chuan pound 1,000 tuak chhuah a tum a ni. Mahse a thiltih hi miten hre darhin ngaihven leh ngaihhlut a hlawh hle a, sum thawhtu pawh an pung chak hle. Mi maktaduai khat chuangin sum thawh puiin  £32,794,701 a tuakchhuak hman a ni. A thiltih avang hian PM Johnson pawhin lawmthu hrilhin, hun harsa tak an tawn mek karah mipuite tana beiseina siamtu, an ram tana rohlu dik tak a nih thu a sawi a ni.

A kum 100-na pian­chamah pawh PM leh Queen hian lawmpuina hlanin, 1st Battalion The Yorkshire Regiment chuan honoray colonel nihna a pe bawk. Hmun hrang hrang aṭangin piancham lawmpuina card 140,000 a dawng a ni.