Covid-19 damdawi siam nan US-in dollar mtd 354 hman remti

US president Donald Trump kaihhruai sorkar chuan an rama Covid-19 vaccine hmuhchhuah a nih theih nan leh, he hri kaite enkawlna tur damdawi siam belh a nih theih nan US-a private company, Phlow Corp hnenah US dollar maktaduai 354 hman a rem ti.

Covid-19 hri kai hi US-ah hian an pung chho zel a, hri kaite enkawl nan hian ram dang aṭanga damdawi lakluh a ni. Heng damdawite hi US-in a ram ngeia siamchhuah ve a duh vang leh, hri kaite enkawl nana ram dang aṭanga damdawi an lakluhah indaihkhawp lohna a awm avangin siam chhuah a tum ve ta a ni. 

India leh China chu he hri kai enkawlna kawnga damdawi ngah ram an ni a, India aṭangin thla hlui khan US chuan hydroxychloroquine ṭhahnem tak a lo la lut tawh bawk a ni.

"He hri leng laka kan ram mipuite him nan hri kaite enkawlna tur kan rama mi kan neihsaah indaihlohna a awm a, hei vang hian ram dang aṭangin kan la lakluh a ngaih phah ta a ni. Chuvang chuan damdawi lama kan intodelh theih nan kan ram chuan damdawi siamchhuah lamah ṭan a la thar dawn," tiin White House Office of Trade and Manufacturing Policy director, Peter Navarro chuan a sawi.    

Phlow company hian private sector-te a thawhpui dawn bakah, Civica Rx, Ampac Fine Chemical  com­pany leh ram chhunga medi­cine institution zawng zawngte pawh a thawhpui bawk dawn a ni. Damdawi a siam tur zawng zawng hi US-ah siam vek tur a ni a, nakin zel atan pawh heng damdawi siamchhuah runpui neih an tum hi US tan a ṭhat dawn thu Phlow company chuan an website-ah an tarlang.