Myanmar sipai sorkarin East Timor palai hnawt chhuak

Myamnar-a sipai sorkar chuan East Timor sorkarin sipai sorkar dodaltu pawl meeting a neihpui avangin, an rama East Timor senior diplomat chu Myanmar ram chhuahsan turin a hriattir.

Myanmar foreign ministry chuan Pathianni khan thuchhuah siamin, East Timor sorkar chuan Myanmar sipai sorkar dodaltute din, National Unity Government (NUG) chu inzawmna a siampui a ni, a ti. Hei vang hian Yangon-a East Timor Embassy-a charge de'affairs chu September 1 hma ngeia an ram chhuahsan tura hriattir a nih thu a tarlang.

Sipaite'n civil sorkar thuneihna hnehchhuh a, sorkar an siam hnuah an rama ram dang palai awm an hnawh chhuah hmasa ber nia hriat a ni. Sipaite'n thuneihna an chan hnuah, ram dang zawng chuan ambassador dah loin, no. 2 diplomat an dah a ni.

East Timor hian Myanmar sipai sorkar hi langsar takin a sawisel fo a, sipai dodaltu pawl lam a thlawp thu pawh a sawi lang ṭhin. July 1 khan East Timor president Jose Ramos-Horta chuan NUG-a foreign minister Zin Mar Aung chu an ram prime minister thar Xana Gusmao lak luh inkhawma tel turin official-in a sawm a ni. Kar liam ta khan NUG human rights minister, Aung Myo Min chu East Timor-a human rights training program-a tel turin sawm a ni bawk.

Myanmar sipai sorkarin an ram palai a hnawt chhuak chu an dem thu East Timor sorkar chuan a sawi. Myanmar rama democracy tundin a nih leh theihna tura hmalakna chu an thlawp thu leh, sipai sorkar chu mihring dikna chanvote zahsak a, an ram chhunga buaina thleng mek chu boruak ṭha tak hnuaia chinfel dan ngaihtuah tura a phut thu a sawi.