Khawthlang ram puihnain inthlan a buatsaih theih : President Zelenskyy

Ukraine president Volodymyr Zelenskyy chuan indona an hmachhawn mek karah, inthlanna senso leh mipuite himna tura khawthlang ramte'n an pui a nih chuan inthlanpui buatsaih theih a nih thu a sawi.

President Zelenskyy hian Pathianni khan US Senator-in nakkuma inthlanpui neih tur puang tura a phutna chhangin, khawthlang ramte'n an pui a nih chauhin inthlanpui hi buatsaih theih a ni dawn tih hi a sawi a ni.

Russia nena an indo hnuah Ukraine hi martial law hnuaiah awmin, ni 90 hnuah pawhsei zel a ni. Tuna an puan mek hi November 15-ah a tawp ang. Martial law hnuaiah hian inthlan hi buatsaih theih a ni lo.

Dan pangngaiah chuan Parliament inthlan hi October thlaa neih tur an ni a, hemi hnu nakkum March thla hi President thar thlanna neih hun tur a ni bawk.

August 23 khan American legislator ṭhenkhat chuan Ukraine hi an tlawh a, an zinga mi Senator Lindsey Graham chuan Ukraine chet dan chu a fak rualin, an danglam a ni tih lantirna turin indona an hmachhawn mek karah pawh inthlanpui hi buatsaih turin a ti a ni.

Zelenskyy chuan inthlan buatsaih hi a hautak hle a, boruak ṭha leh muanawm tak hnuaiah pawh USD mtd 135 vel zet sen a ni a, indo mek karah buatsaih a nih phei chuan eng zat chiah nge ngai dawn tih a hriatthiam mai loh thu a sawi, "Hei vang hian US leh Europe ramte chu inthlanna senso tur min pe turin ka ti a ni. Ralthuam leina tura sum min pekte chu pawhpen a ni dawn lo," a ti bawk.