SKorea-ah School an hawng ṭan

South Korea-ah  hri leng avanga hunrei tak school  khar a nih hnuah nimin aṭang khan high school te hawn an ni leh ṭan a, middle leh elementary school te erawh hawn an la ni lo thung. 

SKorea-ah hian academic year hi March thlaah an ṭan a, mahse January thla khan an ramah Covid-19 kai hmuh a nih avang leh, a hnuah hri kai hi an pun chhoh tak zel avangin school hawn hun hi ṭum nga an sawn  hla hman a ni. Ram chhungah lockdown kalpui ve lo mah se, zirna inte chu khar chhunzawm an ni a, April thla aṭang khan online class an kalpui a, online class hi zirlai maktaduai 5.4 velin an la a ni. 

Education official-te chuan high school-te hi hawn leh ni mah se, school naupang, zirtirtu leh staff zinga hri kai hmuh an awm a nih chuan school hi khar nghal a ni zel dawn tih an sawi.