Nepal map siam tharah India nena ram inchuh an ramah an rin lut
Nepal prime minister KP Sharma Oli kaihhruai cabinet-in political map thar a pawmah chuan India nena an inrina, ram pahnihten an inchuh mek Lipulekh, Kalapani leh Limpiyadhura ramte chu Nepal ram chinah rin luh an ni.
Rorellai, Nepal Communist Party member-te chuan Parliament-ah special resolution pulutin, Lipulekh, Kalapani leh Limpiyadhura-te chu Nepal ram chinah dah let leh an phut.
Nepal foreign minister Pradeep Kumar Gyawali-a'n ramri chungchanga India nena an buaina chu inbiakna hmanga chinfel a ni dawn tih a sawi hnu lawkah, he map thar hi siam a ni leh si a ni.
Lipulekh pass hi India chuan Uttarakhand-a Pithoragarh district chhunga mi niin a chhal a, Nepal hian an rama Dharchula district huam niin a sawi thung.
Map tharah hian ramri ram km 335 huam chu Nepal-ah rin luh a ni. Minister Gyawali chuan political map thar siam hi ministry of land management chuan mipuite hmuh turin a tlangzarh thuai dawn tih a sawi.
Nikum October thlaa India-in political map thar a siamah Lakapani leh Lipukethte chu a ram chinah a lo dah tawh bawk a, hei vang hian ram pahnihte hi an intihthiam loh phah a ni. Nepal map tihchhuah thar pawh hian India a tihlungawi lo hle rin a ni.