Bangladesh-in kuminah Rohingya thawn kir hna kalpui tum

Bangladesh sorkar chuan Myanmar aṭanga ral tlan, Rohingya-te chu kumin kum tawp lama an ramah thawn kir hman a tum.

Foreign Secretary Masud Bin Momen chuan Rohingya raltlan zingah mahni duh thu ngeia an rama kir duh, mi 1,000 vel chu thawn kir hmasak phawt an ni dawn tih a sawi. Hemi atana an inbuatsaihna kawng khat atan, thla thar hian Bangladesh palaite chuan Myanmar an tlawh dawn. Myanmar team lam pawh raltlante be turin Bangladesh-ah an zin dawn bawk a ni.

Momen chuan, 'Thawn kir tur list mi 3,000 chuang kan buatsaih a, a hmasa ber atan December thlaah mi 1,000-te thawn kir phawt tum a ni, a ti. Bangladesh-a Rohingya refugee camp hrang hrangah kum tin nau piang 30,000 vel an awm belh ziah tih sawiin, ram hrang hrangte hnenah pawh raltlante chhawmdawlna pe chhunzawm zel turin a ngen.

Bangladesh khawpui, Dhaka aṭanga chhimchhak lam km 300 vela hla, Cox Bazar-a Kutupalong leh Nayapara refugee camp-ah Rohingya raltlante hi maktaduai khat chuang an khawsa mek. Cox Bazar-ah hian refugee camp 33 a awm a, heng hmunah hian mau leh tarpaulin structure hmangin chenna turte hi siam a ni. Camp tinte chu a tawt em avangin, kum 2021 aṭang khan Bangladesh sorkar chuan Bhasan Char island-ah camp siamin a sawn chhuak ṭhen a, mi 30,000 dawn sawn chhuah an ni tawh. Kumin July thla thleng khan Cox Bazar-a camp 33-ah Rohingya raltlan hi nuai 9.31 vel an la awm a, an awmna hmun hi square km 24 bial vel chauha zau a ni.

United Nation-in refugee camp-a in pakhat awmna atan metre 45 bial zel ang a ruahmanna chu Cox Bazar-a camp 33 zingah camp parukah chiah an zawm thei. Camp 24-ah chuan chenna in pakhat atan hian meter 29 bial zel ang chauh ruahman a ni. Camp 3 chu a chep ber a, mi pakhat chenna atan metre 12 bial zel ang siam a ni.