Trump campaign-in a mugshot hmangin USD mtd 7 chuang hmu

US President hlui, Donald Trump chuan 2024 President thlanna neih tura Republican candidate nih tuma a campaign-naah, a mugshot chuanna thawmhnaw siamin, heng an thil siam hralhna aṭang hian USD mtd 7 chuang zet an hmu tawh.

Donald Trump hi 2020 inthlana a chak lohnaah, result tihdanglam tuma puh chungchangah thubuai siamsak niin, kar liam ta khan Atlanta, Georgia-a Fulton County Jail-ah dah a ni a, hetah hian police record atan a thla laksak a ni. US President ni tawh zinga police record atana thlalak, mugshot nei hmasa ber a ni bawk. Jail-a minute 20 vel a awm hnuah USD 2,00,000 bond agreement hmangin Trump hi chhuah leh nghal a ni.

Jail aṭanga chhuah a nih hnuah, Trump campaign hian a mugshot chuanna T shirt, shot glass, mugs, bumper sticker, signed poster leh bobblehead doll te an siam nghal a ni. Kumin kum chanve chhungin Trump campaign hian USD mtd 53 an hmu chhuak tawh.