Papua New Guinea-in Jerusalem-ah embassy hawng dawn

Papua New Guinea (PNG) chuan kar leha prime minister James Marape-a'n Israel a tlawh hunah, Jerusalem-ah embassy an hawng nghal dawn.

Kum 1978 aṭang khan PNG leh Israel hian palai an intir tawn tawh a, PNG hian Tel Aviv-ah consulate nei mekin, Israel hian Australia-a a embassy kaltlangin ram pahnihte thawh dunna hi a vil thung.

Israel Ministry of Foreign Affairs chuan kumin February thla khan PNG hian Israel-a an embassy hmasa ber tur an hawn tur thu hi a lo sawi tawh a ni.

Israel-in a khawpuia Jerusalem a puanna chu ram tam zawkin a pawmsak lo a,embassy-te pawh Tel Aviv-ah an dah a ni. US chuan Donald Trump a president laiin, kum 2018 khan Tel Aviv aṭangin Jerusalem-ah embassy hi a sawn. Kosovo, Guatemala leh Honduras-te pawh Jerusalem-ah hian an inbun bawk.

Israel leh Palestinian-te chuan Jerusalem hi an khawpuiah an chhal ve ve a ni. Kum 1980 khan Israel Parliament, Knesset chuan Jerusalem Law a pass a, Jerusalem khawpui chu Israel ram pum khawpuiah a puang a, hei hi Palestinian lam chuan an pawm lo thung.