Islamabad HC-in Imran Khan hremna titawp

Islamabad High Court chuan District Court-in an ram prime minister hlui, Imran Khan-a kum thum tang tura hremna a pek chu a tihtawpsak.

District Court chuan August 5 khan Toshakana corruption case-ah Pakistan Tehreek-e-Insaf (PTI) hotu, Imran Khan hi thiam loh chantirin, kum thum tang turin a hrem a ni. Hemi hnu hian Khan hi Lahore-a a chenna in aṭangin man nghal a ni a, Attock jail-ah a tang mek.

Court-in thiam loh a chantir hnuah, Election Commission of Pakistan (ECP) chuan Imran Khan hi kum nga chhung politics khel thei lo turin a hrem zui ve leh bawk a, hei vang hian an ram inthlanpui neih turah pawh a chuh ve thei dawn lo a ni.

Imran Khan chuan District Court-in hremna a pek chungchungah High Court-ah petition a theh lut a, Thawhṭanni aṭang khan Islambad High Court chief justice Aamir Farooq leh justice Tariq Mehmood Jahangiri awmna division bench chuan ngaihtuahin thutlukna hi a puang.

Khan-a lawyer, Naeem Haider Panjoth chuan CJ-in an ngenna pawm a, hremna a tihtawp thu a sawi a, eng anga kalpui zel nge a nih dawn tih erawh hriattir an la ni ang tih a sawi.