UN hotuin Africa ramte pui turin ngensak Africa khawmualah hri kai 80,000 chuang awm

Africa Centers for Disease Control and Prevention (Africa CDC) chuan Africa khawmualah Covid-19 kai zat chu mi 88,172 an tling tawh tih an sawi. 

Hri leng hi Africa ram 54-ah a darh tawh a, he hri vanga thi hi mi 2,835 an awm tawh a ni. Africa CDC chuan hmarlam bialah hri leng hi a hluarin thi pawh an tam ber niin an sawi. 

United Nations secretary-general Antonio Guterres chuan Africa rama hri leng dona kawngah an theih anga pui turin ram dangte a ngen. Hemi rual hian Africa ramten hri leng dona kawnga an hmalakna chu a fak zui bawk. Hri darh tur venna atana an hma lak danah ramdangten zir tur an nei a ni, a ti. Africa ram tam zawk sorkar leh pawlten huaisen taka invenna an kalpui hma avangin hri pawh a darh chak loh phah tiin a sawi a ni. 

Guterres chuan Africa ramte hmalakna chu a  fak rualin, hri leng hian ram hmasawnna tur nasa taka a tihṭhuanawp dawn avangin he khawmualpuia mi maktaduai tel chu retheihna khurah hnuhluh an ni dawn tih a sawi. Hei vang hian ram dangte chu Africa ram pui tur hian a sawm nghal bawk a ni. 

Africa health system tihchakna tur te, food supply a chatlak lohna turte, sum lama an tlakchhiatna tur venpui tur te, zirna, hna leh sumdawnna te a kal chhunzawm theihna tura pui turin UN hotu chuan a ngen sak.