Afghanistan-a inkahnaah mi 7 thi

Afghanistan-a Parwan province khawpui Chare­kar-a mosque-ah inkahna a thleng a, mi 7 an thih bakah mi dang 12 in hliam an tuar. 

Silai hmetpuaktute hi engzat nge an nih tih Afghanistan Ministry of Interior chuan a la finfiah thei lo a, Taliban firfiakte thiltih an nih an ring a, mahse Taliban lam hian an tih a nih loh thu an tarlang thung. Charekar hmuna mosque-a ṭawngṭaia kalte chu  pawikhawihtute hian an pawng kah a ni. 

Muslim-te hian Ramadan fast an hman zawh hlim a ni a, mosque-ah hian tlai lamah ṭawngṭai turin an kal a ni. 

Kar liam ta khan Afgha­nistan khawpui Kabul-a Dasht-e-Barchi hospital-a maternity ward-ah mi pakhat, police uniform hain silaiin mi a pawng kah tawh bawk a; mi 24 thiin an zingah hian nausen, nu leh nurse-te pawh an tel. He thil thlengah hian Taliban firfiakte chu rinhlelh ni mah se, anni lam chuan an pha thung a, US chuan Islamic State of Iraq leh Levant (ISIL leh ISIS) thiltih a nih a ring thung.

Kumin February thla khan US leh Taliban chuan Afghanistan aṭanga US kaihhruai ram dang sipai awmte lakchhuahna tur inremna an lo siam tawh a, mahse hemi hnu hian pawikhawihna hi a lo thleng zawm reng tho a ni. Afghanis­tan sorkarin inkahhai puan a rawtna chu Taliban-te hian an la hnawlsak zel bawk.