Japan-in China thiltih dan WTO-a thlenah vau

Japan sorkarin Fukushima nuclear plant-a tuite tuifinriata a paih chhuah avangin China chuan Japan ram aṭanga lui lam sa lak luh a khap nghal. Hei vang hian Japan chu lungawi loin, China thiltih dan chu World Trade Organisation (WTO)-a thlenah a vau.

Fukushima plant-a lirghingin a tihchhiat radioactive reactor-te vawn daihna tura tui an hmante chu hun rei tak an sawngbawl hnuah, Japan sorkar chuan mihring tan pawh a him a ni tih sawiin kar liamta Ningani aṭang khan tuifinriatah a paih chhuak ṭan a ni. Mahse a ṭhenawm ramte chuan an sawisel a, a bikin China phei chuan a dodal nasa hle a ni.

Japan rama sumdawng leh mimal hrang hrangin China number aṭangin, Fukushima plant aṭanga tui paih chhuah chungchangah vauna leh sawiselna pawh an dawng nasa hle tih an sawi. Fukushima mayor, Hiroshi Kohata chuan ni hnih chhungin khawpuia chengte chuan phone call hmanga vauna hi 200 chuang an dawng hman tih a sawi. China rama Japan embassy pawh mi ṭhenkhatin lungin an tawng bawk a ni. He thil thleng avang hian Japan foreign ministry chuan an rama Chinese ambassador pawh koin, an lungawi loh thu pawh an thlen tawh bawk.