Gabon sipaite'n an ram sorkar paihthla

Central Africa-a Gabon ram sipaite chuan an ram sorkar paihthlain, inthlan an neih zawh taka result pawh hnawl a nih thu nimin khan an puang.

Sipaite hian an ram thuneihna an lak thu hi nimin khan national TV-ah an puang a, an rama institution zawng zawng - sorkar, Senate, National Assembly leh Constitution Court-te pawh ṭhiah nghal vek a ni tih an sawi.

Sorkar paihthlatu Gabon sipaite hi Republica Guard member bakah, regular army-a sipai leh police officer-te an ni. August 26-a an ram inthlanpui neih leh result chu hnawl a ni, an ti.

August 26-a inthlanpui an neihah khan kum 14 chhung thuneihna lo chelh tawh, president Ali Bongo Ondima chuan vote tla aṭanga 64.27% hmuin a khingpui Albert Ondo Ossa chuan 30.77% a hmu. National Election authority-in President Bongo chak thu a puan hnu lawkah, sipaite hian sorkar paihthlain, thuneihna an chhuhsak thu hi an puang zui a ni. Sorkar an paihthlak chhan hi an rama remna leh muanna humhim zel a nih theihna tur a ni tih an sawi bawk.

President Bongo khingpui, Ondo Ossa chuan result puan hma aṭangin inthlan hi Bongo camp lamin an tichingpen niin a lo puh tawh a, a campaign manager Mike Jocktane chuan Bongo chu thisen chhuahna thlentir kher loa a thuneihna hlan chhawng turin a lo ti tawh bawk a ni. Inthlan result puan hma aṭang hian Bongo kaihhruai sorkar chuan curfew puangin, an ram pumah internet a titawp bawk. Hei hi thu dik lo thehdarh tur leh, tharum thawhna thleng tur venna atana ti an nih thu an sawi.