Wagner chief Prigozhin vuiliam a ni

Russia-a Wagner mercenary hotu, kar liam taa thlawhtheihna che suala thi, Yevgeny Prigozhin chu Thawhlehni khan vui a ni a, St. Petersburg khaw daia thlanmualah phum a ni.

Prigozhin vuina inkhawm hi media mite leh mipui nawlpuiin an chim buai lohna turin tlang thang lo taka buatsaih a ni a, Wagner press service chuan Yevgeny Viktorovich thlah duhte tan a thlan chu tlawh zawk turin a ti a ni.

August 23 khan Prigozhin chuanna thlawhtheihna hi Moscow bulah a tla a, thlawhtheihnaa chuang mi 10-te chu an thi vek a ni. Thi zingah hian Prigozhin-a thachhang dawltu ber, Dmitry Utkin pawh a tel.

Private military company, Wagner hian Russia-in Ukraine a runnaah Russia sipaite pawh an pui a ni. Mahse Wagner fighter-te chunga Russia sipaite chet danah lungawi loin, kumin June thla khan Prigozhin hi a hel a, a kaihhruaiin fighter eng emaw zat chuan lungawi lohna lantir tumin Moscow lam an pan a ni. Mahse Belarus president Alexandre Lukashenko hmalaknaa inbiakna neih a nih hnuah, Wagner sipaite hi an base lamah kir lehin, Prigozhin pawh hi Belarus lamah a kal thung. He thil thleng avang hian Putin chuan Prigozhin chu phatsantuah a puh a, hemi hnu hian Prigozhin dinhmun hi a him tawh lo hle nia sawi a ni.

Prigozhin chuanna thlawhtheihna chet sual chungchangah pawh ṭhenkhat chuan Russia sorkar chu inrawlhah an puh a, mahse, Russia chuan an puhna hi a pha thung. White House pawhin Prigozhin thihnaah hian Russia sorkar chu mawhphurtu niin a puh.