US-in Russia hnena ralthuam hralh lo turin NKorea a vau
US sorkar chuan NKorea chu Ukraine nena indo mek, Russia hnenah indonaa a hman tur ralthuamte leitir lo turin a vau.
White House national security spokesperson, John Kirby chuan Nilaini khan hemi chungchang hi sawi chhuakin, Russia leh North Korea-te inkar chu ngaihven a ngai hle tih a sawi. "North Korea chu Russia nena ralthuam inleitir tura inbiakna an neihte titawp tur leh, Russia hnenah ralthuam pe leh hralh lo turin kan ngen a ni," a ti. Kirby chuan tun hnaia NKorea ram tlawhtu, Russia defence minister Sergei Shoigy chuan NKorea hotu Kim Jong Un nen an inkawmnaah ralthuam leitir ngei tuma hneh a tum tih a sawi. Hemi chungchang an hriatna erawh an puangzar duh lo tih a sawi bawk.
US hian Ukraine do mek tu, Russia pui lo turin ram hrang hrangte chu a lo hriattir tawh a ni. Nikum khan NKorea chu Russia hnenah artillery shell hralhah a lo puh tawh a, hemi hnuah pawh NKorea hian Russia sipaite thuam chakna tur hian a la pui chhunzawm reng a ni, tiin Kirby chuan a sawi.
Russia leh NKorea chuan US puhna hi an pha thung a, hemi rual hian NKorea chuan US-in ram dangte awpbeh tumna policy a kalpui avangin, Russia chuan a ram chin humhimna turin sipai chakna hmanga a chet chhuah a ngaih phah a ni, a ti.