Johannesburg-a in kangah mi 70 an thi

South Africa rama khawpui lian ber, Johannesburg-ah nimin khan, in chhawng ngaa sang a kang a, mi 70 an kang hlum a, hliam tuar mi 40 chuang an awm bawk.

Emergency Management Services thupuangtu Robert Mulaudzi chuan kangmei chhuak vanga thi zingah hian naupang pasarih an tel tih a sawi a, thi zinga ṭhenkhat chu tunge an nih hriat theih loh khawpin an kang chhia a ni.

City mayoral committee member, Mgcini Tshwaku chuan kangmei chhuah chhan tak hi hriat chian a ni lo a, mahse, building chhunga mei chhem aṭanga chhuak a nih mai theih thu a sawi.

Kangmei chhuahna building hi 'hijacked building' tia an sawi a ni a, ram dang aṭanga pem lut, awmna mumal nei lote'n khawsakna atan an hmang a ni. Kangmei chhuah lai pawh hian he building-ah hian mi eng zat chiah nge khawsa hriat chian a ni lo.

South Africa hi Africa khawmuala economy ṭha ber ram zingah a tel a, hei vang hian Africa ram dang aṭanga pem lut tam tak an awm. Official statistic-a a lan danin, mi maktaduai 60 vel chenna, South Africa ramah hian ram dang aṭanga pem lut maktaduai 2.9 vel an awm. Heng bakah document nei loa lut mi tam tak an awm rin a ni bawk.