Gabon sipaite'n President Bongo an hreng

Central Africa-a Gabon ram sipaite chuan sorkar thuneihna an laksak hnuah, an ram president Ali Bongo Ondimba chu a chenna inah pawn chhuak thei loin an hreng a, ram hruaitu thar tur an ruat nghal bawk.

Election body-in an ram inthlan neih zawh takah President Bongo chu a term thumna atan thlan tlin leh a nih thu a puan hnu lawkah, Thawhlehni khan sipaite hian sorkar thuneihna chu an laksak thu leh inthlan result chu hnawl a nih thu puangin, ramri an khar nghal a, e institution zawng zawng ṭhiah a ni tih an puang nghal a ni.

Sipaite chuan Nilaini zanah khan civil sorkar paihthla a, thuneihna changtu Committee for the Transition and Restoration of Institutions hruaitu thar atan lungrual takin Gabonese Republican Guard hotu hlui, Gen. Brice Clotaire Oligui Nguema chu ruat a nih thu an puang zui leh bawk. Gen Oligui hi President Bongo laichin (cousin) a ni.

President Bongo hian hrenbeh a nihna aṭang hian video tichhuakin, an ram mipuite chu sipaite dodal a, amah an thlawpna lantir thawm nei turin a sawm. Hetih lai hian an ram khawpuiah sipai chakna hmanga sorkar paihthlak a nih avanga lawmin mipuite an pung khawm thung. Kum tam tak an ram roreltu, President Bongo chu an ram thil neihte hmanga amah leh a chhungte vulh hausain, ram mipuite tam zawk dinhmun rethei leh harsa taka dahah an puh.

Ram hruaitu atana ruat thar, Gen Nguema chuan office luah nghalin, internet service pawh tinung leh nghal turin a hriattir a, hei bakah hian intrnational radio leh tevision channel signal-te pawh pe chhuak turin thupek a tichhuak nghal a ni. An ramah boruak ṭha leh muanawm siam a ṭul thu leh, theihtawp an chhuah tur thu a sawi.