Muhammad Yunus thubuai titawp turin Bangladesh ngen

Khawvela ram hruaitu leh Nobel laureates 170 chuangte chuan Bangladesh sorkar hnenah Nobel Peace Prize lo dawng tawh, Muhammad Yunun laka thubuai a siamte titawp a, a beihna tawp san turin an ngen.

Bangladesh prime minister Sheikh Hasina hnena open letter thawntu zingah hian US president hlui Barack Obama, UN secretary-genenal hlui Ban Ki-moon leh Nobel Peace Prize winner 100 chuang an tel. Bangladesh rama democracy leh human rights dinhmun derthawng zel chu an ngaihtuah hle tih an sawi.

Kum 83 mi, Yunus hian an rama retheihna um bona tura hma lain, kum 1983 khan Grameen Bank a din a, bank aṭanga loan la thei lo, mahni kutkawiha eizawngte hnenah loan tenaute a pe chhuak ṭhin. A bank hmang hian mi tam tak retheihna aṭangin a khaichhuak a, ram changkang zawkah hna thawka hma la turin a fuihin a pui ṭhin bawk. A hnathawh avang hian kum 2006 khan khawvel chawimawina ngaihhlut, Nobel Peace Prize hlan a ni. Yunus hian an ram politician-te chu a sawisel fo a, mipui dinhmun chawikan lam aia sum ringawt atchilhah a puh.

Bangladesh prime minister Hasina chuan Yunus hi na takin a bei let a, thisen dawttu ti hiala puhin, Grameen Bank hi thingtlang mite hnena loan a puktirte chu tihluihna hmangin a rulhtir ṭhin a ni, a ti. Kum 2011 khan PM Hasina chuan Grameen Bank thiltih dan hi chhui chiang turin thupek a tichhuak a, Yunus chu sorkarin kaihhruaina dan a siamte zawm loa puhin, bank managing director a nihna aṭangin ban a ni bawk. Kum 2013 khan sorkar phalna hmu loa pawisa dawngah puh a ni a, heng a thil dawn zigah hian Nobel Prize award leh a lehkhabu aṭanga hlawkna a hmuhte pawh a tel nia puh a ni. Hei bakah hian company dang a din, Grameen telecom kaihhnawihah thubuai dang a nei bawk a, August thla tir lam khan labor law bawhchhiaah puh a nih avangin thubuai siamsak a ni leh bawk.