Pope Francis-a'n Mongolia a tlawh

Roman Catholic kohhran hotu, Pope Francis chuan nimin khan Buddhist ram, Mongolia a tlawh. Pope ni tawh zingah Mongolia ram tlawh hmasa ber a ni.

Kum 86 mi, pontiff hi Rome aṭangin ITA Airways thlawhtheihna hmanga darkar 10 an thlawh hnuah nimin zing 9:51 khan Ulaabaataar airport-ah a ṭum a, airport-ah Mongolia foreign minister-in a lo hmuak. A chawlh hahdam hnuah vawiin hian Ulaabaatar-ah Mongolia sorkar hotute leh palaite hmaah thu a sawi ang. Pathianni hian Steppe Arena-ah Mass a buatsaih dawn a, hei bakah hian sakhaw hrang hrangte inhmuh khawmnaah telpuiin, charity centre a hawng bawk ang.

Mongolia ramah hian mipui maktaduai 3.3 vel awmin, an zingah hian Catholic kohhran mi leh sa chu 1% aia tlem, mi 2,450 chauh an awm.

Pope hian Rome aṭanga Mongolia a panna kawngah hian ram 20 chuang a kaltlang a, heng zignah hian Bosnia Herzegovina, Montenegro, Bulgaria, Turkey, Georgia, Azerbaijan, Kazakhstan, leh China-te an tel. An kaltlang ram hrang hrang hruaitute hnenah duhsakna thu a thawn vek a ni.