China ṭhenawm ramte'n an map thar dodal

China sorkarin an ram map thar, 'standard map for 2023' a tihchhuah chu a ṭhenawm ram, Philippines, Malaysia, Indonesia leh Vietnam-te chuan an pawm loh thu a hran ṭheuha thuchhuah siamin an tarlang. A hmain India chuan he map hi a lo sawisel tawh bawk.

August 28 khan China hian map thar hi tichhuakin, India-a Arunachal Pradesh state leh Aksai Chin-te chu a ram chinah a rin luh bakah, a ṭhenawm ramte nena neitu nih inchuha an buai mek, South China Sea pumpui pawh a ram chinah a rin lut vek a ni.

Philippines Foreign Ministry chuan Ningani khan thuchhuah siamin, China standard map thar chu an pawm lo tih a sawi a, China-in Philippine ram leh maritime zone-a neitu nih a tumna chu international law-a behchhan engmah nei lo a ni, a ti. Maylasia sorkar pawhin map chu an pawm lo tih sawiin, he map-ah hian Malaysia tuipui chin leh, Malaysian Exclusive Economic Zone (EEZ) hmun ṭhenkhat pawh China hian a ram chinah a dah niin a sawi.

Indonesia foreign minister Retno Marsudi chuan ramri, territorial line-te chu UN Convention on the Law of the Sea 1982 (UNCLOS 1982) zulzui veka ziah a ni tur a ni, a ti ve bawk. Vietnam pawhin he map thar hi an ram thuneihna palzutna a ni tiin, international law a bawhchhia a ni, a ti.