Israel-ah Eritrean pawl 2 intibuai

Israel rama Tel Aviv khawpuiah Inrinni khan Eritrean pawl pahnih an intibuai a, buaina chhuakah hian mi 100 chuang an hliam. Israel police-te chuan mipui pung khawmte hnawhdarh nan hian tear gas an hman bakah, van lam hawiin silaite an hmet puak a ni.

Tel Aviv khawpuia intibuaite hi Eritrea sorkar thlawptu leh dodaltute an ni a, Eritrean embassy bulah buaina hi chhuakin, bungruate pawh an tichhe nual a ni. Police-te'n daidanna an siamte chu tichhiain, an pun khawmna bula police motor leh motor dang awmte tukverh leh, dawr tukverhte pawh an tichhe bawk. Hliam tuar zingah hian police officer 30 vel an tel.

Eritrea ramah hian kum 1991-a independence an hmuh aṭangin President Isaias Afwerki (77) chuan thuneihna a la chelh chhunzawm zel a, inthlan buatsaih a la ni lo a, political party din khap a ni bawk. Parliament an nei lo a, independent court emaw, civil society organisation emaw pawh a awm lo bawk. Sipaia ṭan ngei ngei ngaihna dan siam a ni a, labour system khauh taka kenkawh ni bawkin, hei vang hian an ram mi tam tak chu ram dangah an tlanchhia a ni. Eritrea hi khawvela human rights record chhiatna ber ram zingah a tel.

Israel-ah hian Eritrea aṭanga pem lut hi mi 20,000 dawn an awm a, sorkar thlawptu leh dodaltu lamte an inthliar nasa hle. Inrinni khan Eritrean sorkar thlawptu lamte'n an ram embassy bulah President Afwrki-a'n thuneihna a chelh champha lawmna an buatsaih a, hemi ni vek hian a lehlam pawl chuan an ram sorkar duh lohna lantirna hun an hmang ve bawk. Police-te chuan pawl pahnihte hian hun an hman turah hian phalna pek ve ve an ni a, mahse, inchimbuai lo tura intiamtir an ni tih an sawi. Mahse an intiamna hi bawhchhiain, sorkar dodaltu lam chuan police-te'n daidanna an siamte hi tichhiain pawl lehlamte hi an bei a, buaina nasa tak a chhuak zui ta a ni.