Nobel Foundation-in Russia palai an sawmna sût

Nobel Foundation chuan kumina Nobel award semna inkhawm, Stockholm-a neih tura Russia leh Belarus ambassador-te an sawmna chu an sût leh tih a sawi.

Kum 2022 khan Nobel Foundation hian Nobel Prize ceremony leh banquet a buatsaihah, Ukraine ram runtu Russia bakah, Russia thlawptu Belarus ambassador-te chu a lo sawm duh tawh lo bawk.

Kumina Nobel award semna neih turah Foundation hian Sweden rama ambassador awm zawng zawngte chu a sawm a, mahse, Russia leh Belarus palaite sawm tel an ni chu mi tam takin an sawisel avangin, sawmna a pek tawh chu a sut leh ta a ni.

Foundation chuan, Nobel Prize chu mi tin huap zo tur a nihna angin a zau thei ang bera thehdarh chu an thupui a ni a, hei vang hian sawmna pawh pek vek a ni tih a sawi. Mahse a sawiseltu lam thawm a rin em avangin, nikuma an tihdan phung ni lo an kalpui ang bawkin Russia leh Belarus palaite sawmna chu a sut leh tih a tarlang.

Hetih lai hian Sweden prime minister Ulf Kristersson chuan Foundation thutlukna chu a pawmpui lo tih a sawi a, "Award ceremony-a tel turte sawmtu tur zawk ni ila chuan hetiang hian ka ti lo ang," a ti. Mahse Swedent politician tam tak chuan Russia palai hi a tel ve dawn chuan Nobel event chu an boycott dawn tih an sawi thung.

Nobel Prize ceremony hi kum tin December 10-ah Stockholm-ah neih a ni ṭhin a, medicine, physics, chemistry, literature eh economics-a chawinawina dawng tura thlan chhuahte chuan King Carl XVI Gustaf hnen aṭangin award an dawng ṭhin a ni. Hemi ni vek hian Oslo-ah Nobel Peace Prize hlanna hun hran buatsaih a ni bawk.