Israel PM-in buaina siamtu Eritrean mite thawn kir turin a ti

Israel prime minister Benjamin Netanyahu chuan Inrinni liam taa Tel Aviv khawpuia Eritrea ram aṭanga pem lut pawl pahnihte'n buaina nasa tak an chawh chhuah hnuah, buaina chawk chhuaktute chu an rama thawn kir turin a ti.

Tel Aviv-a buaina chhuak avang hian Pathianni khan special ministerial meeting neih a ni a, PM Netanyahu chuan buaina siamtute laka khauh taka hma lak a nih tur thu leh, mawhphurtute chu an ram lama thawn kir nghal an duh tih a sawi. Eritrean pawl pahnihte inkara buaina chhuakah hian mi 170 chuang an hliam a, hliam tuar zingah Israel police officer eng emaw zat an tel.

Netanyahu chuan meeting-a tel minister-te hnenah an rama dan loa lutte thawn kir an nih leh vek theihna tura ruahmanna siam turin a ti bawk. Hetih lai hian international law hnuaiah, Israel hian an nunna atana him lo nia ngaih ram aṭanga lutte chu tihluihna hmangin a thawn kir thei lo thung.

Prime Minister chuan Inrinnia buaina chhuaka inhnamhnawih, Eritrea sorkar thlawptu zinga mi 1,000 te thawn kir dan tur chu ministerial team-in a ngaihtuah nghal tih a sawi a, "Heng mite hian refugee status an nei lo a, a ram sorkar chu an thlawp tlat a ni. An sorkar an thlawp chuan an tan an rama kir leh chu a ṭha zawk," a ti.

Israel ramah hian Africa ram aṭanga pem lut mi 25,000 vel an awm mek a, an zinga a tam zawk chu an ram buaina leh inawpbehna tlanchhiatsan, Sudan leh Eritrea ram aṭanga lut an ni. Mahse Israel sorkar chuan an rama lut zinga tlemte chauh asylum seeker-ah pawmin, midangte chu economic migrant angin a ngai. Sawiseltu ṭhenkhat chuan Israel sorkar chu an rama tlan lutte ram danga an kal chhuahna tura kawng hrang hranga nawrah an puh a, mahse, eptu party ngei pawhin pem lutte vang hian an awm khawmna, Tel Aviv chhim lamah pawikhawihna a thleng nasa niin an sawi thung.

Pathianni khan national security minister Itamar Ben-Gvir chuan buaina chhuahna hmun hi a tlawh a, police-te hmalakna chu fakin, dan bawhchhetute chu thawn kir an nih hma chu hren an ni dawn tih a sawi. "Hei lai hmunah an awm a ṭulna a awm lo, hei hi an hmun pawh a ni lo," a ti.

Inrinni vek khan Norway-a Bergen khawpuia Eritrean aṭanga pem lut, an ram sorkar thlawptu leh dodaltu pawlte an lo intibuai bawk a, police ṭhahnem tham takin buaina siamte hi an hnawt darh a ni. August thla tir lam khan Sweden khawpui, Stockholm-ah Eritrean festival hmannaah buaina chhuakin, mi 52 in hliam an tawrh phah tawh bawk.