Ukraine President-in Defence Minister a ban

Ukraine president Volodymyr Zelenskyy chuan defence minister, Oleksii Renzinkov chu ban a nih thu Pathianni khan a puang a, defence ministry lamah kalphung thar an ngai tih a sawi.

Defence Minister ban a nih thu a puan hnu hian, State Property Fund enkawltu, Rustem Umerov chu a thlaktu atan a nominate nghal a, Parliament-in a pawmpui leh phawt a ngai ang.

Oleksii Renzinkov chuan Parliament-ah banna lehkha a theh luh nghal thu hi X lamah a post zui ve nghal a, Ukraine media-te chuan London-a Ukraine ambassador-in a awm zui dawn niin an tarlang.

Kum 57 mi, Renzikov hi an ramin indona an hmachhawn aṭangin hriat a hlawh zui hle a, khawthlang ram aiawhte nena meeting an neihah pawh vawi tam tak telin, an ram sipaite thuam chakna tur pe tura nawrna kawngah pawh mi pawimawh tak a ni. Mahse hun eng emaw chen aṭang khan ban a ni dawn nia sawi thawm hi a awm tawh a ni.

Hetih lai hian expert-te chuan cabinet siksawi hian indona an hmachhawn mekah thil a thlak danglam vak an ring lo tih an sawi thung.