Kim Jong-un leh Vladimir Putin-te inhmu dawn

North Korea ram hruaitu, Kim Jong-un leh Russia president Vladimir Putin-te chu Russia ramah inhmuh an tum niin US official chuan a tarlang.

Official chuan tun thla chhungin Kim hi Russia ramah zin a tum a, hruaitu pahnihte hi khawi hmunah nge an inbiak dawn tih hriat chian la ni chiah lo mah se, Vladivostok-ah an inhmuh a rinawm tih a sawi. Hemi chungchangah hiani NKorea leh Russia lam chuan sawi engmah an la nei lo.

National security council thupuangtu, Adrienne Watson chuan tun hnaia NKorea rama Russia defence minister, Sergei Shoigu a zin ṭum khan NKorea hotute chu Russia hnenah ralthuam leitir turin a nawr niin a sawi. Hemi chungchang Kim leh Putin-te inhmuh hunah an ngaihtuah tur nia rin a nih thu a sawi.

Russia hian Ukraine ram a beih meknaah ralthuam, a bikin ammunition leh artillery sheel a mamawh tawh hle a, hengte hi NKorea hian chhek khawl a ngah tawk nia sawi a ni. NKorea hian hrek a tawh mek avangin sum leh ei tur lam a mamawh a, Covid hri leng vanga kum thum chuang ramrite a khar avangin sum lak luhna tur a mamawh zual hle a ni. Hei vang hian Russia hnena a ralthuam mamawhte leitir mai an duh a rinawm a, hemi rual hian a man pawh a chhiar to hle rin a ni bawk.

Kum 2019, April thla khan Kim leh Putin-te hi an inhmu tawh a, Kim hi rel-in Valdivostok-ah a kal a ni.

US chuan Ukraine ram run mektu, Russia chu ralthuam lei chungchanga inbiakna leh inremna siampui lo turin North Korea hi a nawr reng thu Watson chuan a sawi bawk.

Hetih lai hian Shoigu chuan NKorea leh Russia hian joint war games an neih mai theih thu a sawi thung.