Aung San Suu Kyi a dam ṭha lo

Myanmar sipai sorkarin jail-a a tantir mek, an ram hruaitu hlui Aung San Suu Kyi chu a dam ṭha ṭha lo a, jail pawn lama doctor-te rawn a dilna chu sipaite'n an hnawlsak.

Kum 78 mi, Suu Kyi hi prisons department doctor-te'n an enkawl a ni.

''Suu Kyi hi a ha hni a puam nasain thil a ei thei lo a, a lu a haiin a luak reng bawk," tiin a chungchang sawitu, sipaite a hlauh avanga a hming puanzar duh lo chuan a sawi. A thusawi chungchang hi sipai sorkar lam hian an la chhang lo.

Kum 2021,Februay thlaa sipaite'n civil sorkar thuneihna an hnehchhuh hnuah Suu Kyi hi pawn chhuak thei loin an hreng zui nghal a, thubuai tam tak siamsakin, a thubuai 19-ah thiam loh chantir a ni a, kum 27 tang tura hrem a ni. Mahse Sui Kyi chuan an puhna hrang hrangte hi a pha thung.

A chenna ina pawn chhuak thei loa hun eng emaw chen hren a nih hnuah, kumin July thla khan an ram khawpui, Naypyitaw jail-ah dah a ni.

Sipai sorkar dodaltute'n civil sorkar paihthlak tak aiawhtu atana an din, National Unity Government-a thupuangtu, Kyaw Zaw chuan politics thil avanga mante himna leh an hriselna dinhmunte chu sipai sorkar chuan a ngaihvensak tur a ni, a ti. Aung San Suu Kyi bakah politics avanga man dangte enkawlna ṭha leh an himna ngaihtuah tura sipai sorkar nawr turin ram dangte a ngen bawk.