Gabon ram hruaitu atan Gen.Oligui la lut

Gabon rama civil sorkar paihthlatu, sipai pawl hotu Gen. Brice Clotaire Oligui Nguem chu Thawhṭanni khan an ram hruaitu rinawmna thu tiamtirin lak luh a ni.

Gen. Brice Clotaire Oligui Nguem hian President an paihthlak tak, Ali Bongo Ondimba laichin (cousin) a ni. Thawhṭanni khan an ram khawpui, Libreville-a Presidential Palace-ah ram hruaitu atan lak luh ani a, he hunah hian sorkar official, sipai leh tualchhung hotute an tel.

Gabon ram hruaitu atana lak luh a nih hnuahthu a sawiah, Gen Oligui chuan thisen chhuah miah loin sipaite chuan thuneihna chu an hnehchhuh tih sawiin, inthlanna felfai, lang tlang leh rintlak tak buatsaihin mipui sorkar an pe kir leh thuai dawn tih a sawi. "Sorkar tharah chuan tawnhriat lo nei ṭha tawk tak takte hmangin, ram mipuite tana beiseina eng kan siamsak leh dawn a ni," a ti.

Kar liam ta khan sipaite hian President Bongo leh a kaihhruai sorkar chuan an ram chu dinhmun chhe takah a hruai lut nia puhin an paihthla a, a hnuah Gen Oligui chu transitional commitee president atan lungrual takin an thlang zui a ni.