Myanmar-in ASEAN thuchhuah pawm lo

Association of Southeast Asian Nations (ASEAN) hruaitute'n Myanmar rama tualchhung buaina tihreh a la ni lo chu an dem thu an sawi leh, hemi ruala thisen chhuahna nasa tak thlengah mawhphurtua sipaite an puhna chu Myanmar sipai sorkar chuan an pawm lo tih an sawi. ASEAN hruaitute chu ṭan lam neiah an puh.

Myanmar sipaite'n kum 2021 February thlaa an ram civil sorkar thuneihna an hnehchhuh hnua ram chhunga buaina nasa tak a chhuah hnuah, ASEAN chuan buaina tihreh leh boruak muanawm a awm theihna atan Myanmar sipaite hi point panga hmangin inremna an siampui a ni. Mahse an inremna siamte hi Myanmar sipaite chuan an kengkawh zui lo a, hei vang hian Jakarta-a meeting an neih zawhah member ram 10 awmna, ASEAN chuan Myanmar chungchanga thuchhuah hi an siam zui ta a ni.

ASEAN hruaitute chuan Maynmar Armed Forces leh an thawhpui party hrang hrangte chu an rama tharum thawhna thlengte titawp tur leh, civil mi, chenna in leh public facility beihna thlengte titawp tura an phut thu an thuchhuahah an tarlang. 'Myanmar rama tharum thawhna nasa tak thleng chhunzawm reng chu na takin kan dem a ni," an ti.

Myanmar hi ASEAN member ni ve mah se, an rama boruak muanawm a awm theih nan inremna an siamte a zawm duh loh avangin ASEAN thiltih pawimawhah an tel an khap a ni.

Nilaini khan Myanmar foreign ministry chuan ASEAN thuchhuah an pawm loh thu hi tarlangin, "An thlir dan hi thil dik tak ni lo, ṭan lam neia thutlukna siam an ni," a ti. Jakarta meeting-ah hian an hruaitute pawh an tel ve lo a, an ngaihdan leh thlir dante pawh ngaihsak an ni ve lo tiin a tarlang.