Brazil-ah ruah sur nasa leh thli tleh vaangin mi 21 thi

Brazil chhim lamah ruah sur nasa leh thli na tak tlehin chhiatna a thlenah mi 21 an thi tih nimin khan official-te'n an sawi a, tuilen mai hlauhthawnawmin a awm mek tih an sawi bawk.

Rio Grande do Sul state governor, Euduardo Leite chuan an state-in ruah leh thli avanga chhiatna a tawh nasat ber zinga mi a ni tih a sawi. Thi zat pawh hi an la pun chhoh a rinawm.

Thlipui leh ruah thawk vang hian mi 6,000 te chu hmun him lamah an insawn chhuak. Thawhṭanni khan darkar 24 chhungin ruah mm 300 chuang a sur hman a,hmun eng emaw zatah tuilian leh leimin a thleng a ni.

Mi 5,000 vel chenna, Mucum khua chu Taquari lui lianin an khaw chhung hmun 85% a chim a, mi tam tak in chung lama tlanchhiate chu chhanchhuah an ni. Chin hriat loha awm mi eng emaw zat an awm bawk niin mayor Mateus Trojan chuan a sawi.

Brazil president Luiz Inacio Lula da Silva chuan harsatna tawk mekte a tawrhpui thu sawiin, sorkar chu anmahni ṭanpui turin a inpeih reng a ni, a ti.

Kumin February thla khan tuilian leh leimin avangin Sao Paulo state-ah mi 40 vel an lo thi tawh bawk a, nikum khan ruahsur nasa takin an ram hmarchhak lam, Recife khawpui bula chhiatna a thlenah mi 100 an thi bawk.