Proud Boys hruaitu hlui kum 22 tang turin hrem

US-a right-wing Proud Boys group hruaitu hlui, Enrique Tarrio chu kum 2021-a US Capitol beihna thubuaiah thiam loh chantir a ni a, kum 22 tang tura hrem a ni.

Kum 2021, January 6 khan hetih laia US President Donald Trump thlawptute chuan an ram President thlanna neiha a chak zawh loh avang leh, inthlan result thlak danglam phutin buaina an siam a, US Capitol building an bei tel bawk.

Erique Tarrio hi Capitol Building beih a nih lai khan a hmunah awm ve lo mah se, he pawikhawihna thlengah hian mawhphurtuah puhin US District Court chuan thiam loh a chantir a ni. Prosecutor-te chuan Tarrio hi hetih lai hian Baltimore-ah awm mah se, buaina siamtute hi an chet dan tur a rawn hrilh nia sawiin kum 33 tantir turin an phut a, mahse, judge Timothy Kelly chuan Thawhlehni khan kum 22 tang turin a hrem ta zawk a ni.

Judge Kelly hian Capitol building beihna kaihhnawihah hian kar liam ta khan Proud Boys hruaitu dang, Ethan Nordean chu kum 18 tang turin a hrem a, Oath Keepers militia founder Steward Rhodes chu May thla khan kum 18 tang tura hrem a ni lo tawh bawk. Capitol beih a nih chungchangah hian mi 1,100 chuang manin thubuai siamsak an ni lo tawh a, an zinga mi 110 chu thiam loh chantir an ni tawh.