Cyclone-in chhiatna a thlen dan report avangin Myanmar journalist kum 20 tang turin hrem

Myanmar sipai court chuan an rama photojournalist, Sai Zaw Thaike chu kumin May thlaa cyclone Mocha tlehin chhiatna a thlen dan hrang hrang report a, thlalakte a tihchhuah avangin kum 20 jail tang turin a hrem.

Kum 40 mi, Sai Zaw Thaike hi independent online news service, Myanmar Now-a photographer a ni. Myanmar Now chuan military tribunal-in an photojournalist hi Rakhine state-ah hren a nih hnuin, Yangon-a Insein tan inah dah a ni tih a sawi. Tan in chhunga court hearing neih hmasa berah hremna hi pek a ni a, a chhungte tlawh phalsak a nih loh bakah, dan hremi a rawih pawh phalsak a ni lo tih a tarlang bawk.

Myanmar Now chuan May 23 khan Sai Zaw Thaike hian cyclone Mocha tlehin thil a tichhiat hrang hrangte a record laiin, Rakhine state khawpui Sittwe-ah man a ni tiin a sawi. Thlipui tleh avang hian Rakhine state-ah mi 148 an thi a, building nuai 1.88 vel zet a tichhe bawk. Man a nih hnuah thubuai eng emaw zat siamsak a ni a, heng zingah hian ram phatsantua puhna bakah, sipai sorkar chungchanga thu dik tawk lo thehdarha puhna pawh a tel. Thlipui tlehin chhiatna a thlen chungchangah mipuite tichiai tur zawnga thu dik lo thehdarhah puhin, National Disaster Management law bawhchhiaah an puh bawk a ni. Eng thubuaiah ber nge kum 20 tang tura hremna hi pek a ni tih hriat chian a la ni lo bawk.

Myanmar sipaite'n thuneihna an chan hnuah an ram press mite zalenna chu nasa taka rahbehsak an ni a, independent media-te pawh an hrek nasa hle bawk. Media outlet 13 chu an license tihtawpsak ni tawhin, an zingah hian Myanmar Now pawh hi an tel. Journalist 156 man an ni tawh bawk a, an zinga a tam zawk chu chhuah tawh mah se tun thlengin mi 50 vel chu hren beh an la ni tih lcoal monitoring group, Detained Journalists Information chuan a tarlang.