Ramaswamy-a'n Jan 6-a nawrh huaihawtte ngaihdam a tiam

Nakkuma US President thlanna neih tura Republican presidential candidate chuh tumtu zinga mi, Vivek Ramaswamy chuan US President-ah thlan tlin a nih chuan kum 2021, January 6-a US Capitol-a nawrh huaihawtte a ngaihdam tur thu a sawi.

Kum 2020-a US President inthlana Joe Biden-a'n Donald Trump a hneh hnuah khan, kum 2021 January 6-ah Trump-a thlawptute chuan inthlan result-a an lungawi lohna lantirin US Capitol-ah nawrh an huaihawt a ni. Hemi ṭuma nawrh huaihawt zinga 1,000 chuang chu manin thubuai siamsak an ni a, US District Court chuan Thawhlehni khan buaina chhuaka mawhphurtua puhin Proud Boys group hruaitu Enrique Tarrio chu kum 22 tang turin a hrem bawk a ni. Buaina chhuak kaihhnawiha man zinga mi 110 chu thiam loh chantir an ni tawh bawk.

Kum 38 mi, Indian American entrepreneur Ramaswamy chuan US Justice Deparmtent thiltih dan chu demin, 'America hian justice system chi hnih a nei tawh a ni. Anifa leh BLM-a buaina siamte zalen taka an awm laiin, January 6-a nawrh huaihawtte bail pawh theih loin tan tir an ni thung. Biden-a 'Department of Injustice' chuan mi 1,000 chuang zet a man a, kan ram legal system hmel pawh an tibal a ni," a ti.