Russia-in Ukraine ram a luah bial chhungah inthlan buatsaih

Russia chuan Ukraine ram a luahsak, Donetsk, Luhansk, Kherson leh Zaporizhzhia bialah nimin aṭang khan inthlan a buatsaih a, Pathianni thleng vote thlak a ni ang.

Ukraine leh khawthlang ramte chuan inthlan buatsaih hi an pawm lo tih an sawi nghal. Council of Europe chuan Russia thiltih dan chu international law palzutna nasa tak a ni, a ti.

Ukraine Parliament chuan Russia-in a ram a luahsaka cheng mipuite vote a thlaktir hi Ukraine mipuite tan pawh a him lo nia sawiin, inthlan result chu pawm lo turin ram dangte a ngen nghal a ni.

Hetih lai hian Russia hian Ukraine ram a luahsak hoah hian thuneihna pumhlum a la neih loh avangin, a thuneihna sawhnghehna atan inthlan buatsaih hi an tan a pawimawh hle thung.

Inthlanna neih huam chhunga voter-te hian regional legislature tur an thlang chhuak dawn a, an mi thlan chhuahte hian regional governor-te an ruat ve leh ang. Donetsk leh Luhansk province-ah hian local council seat inchuh candidate hi sang tel an awm. Inthlan neihna thawm nei na ber chu Russia president Vladimir Putin-a thlawptu, United Russia an ni a, anni bakah Communist Party leh nationalist Liberal Democratic Party pawhin an chuh ve bawk.

Donetsk leh Luhansk region hmun tam zawk hi kum 2014 aṭang khan Russia hian a awp tawh avangin Russia lam nen pawh an inhnimhnai tawh a, inthlan buatsaih pawh hi thil mak vakah an ngai hran lo. A mi cheng eng emaw zat pawhin Russia lama beh an duh thu pawh an sawi.

Hetih lai hian Kherson leh Zaporizhzhia bialte chu nikum February thlaa Russia-in Ukraine ram a run hnuah a lakte an ni a, heng biala chengte leh Ukrainian activist-te chuan candidate-te chanchin pawh an hre mang lo a, poll worker-te chuan sipaite nen ṭanghoin, in tinah vote thlak turin an hriattir a ni. Vote thlak duh lote chu darkar 3-4 chhung hren an ni tiin Ukraine rights group, Eastern Human Rights Group coordinator, Pavlo Lysianskyi chuan a sawi.