Hong Kong-ah kum 140 chhunga ruah sur nasat ber ṭum thleng

Hong Kong-ah kum 140 chhunga ruah sur nasat ber ṭum a thleng a, khawpui chhung chu tuilianin a chim nasat avangin nimin khan zirna in leh hnathawhna hmun hrang hrangte khar a ni.

Ningani aṭang khan ruah hi nasa takin a sur a, nimin khan sur chhunzawm lehin, emergency service chuan harsatna tawk mi eng emaw zat chhanchhuah an ni tih an sawi.

City weather agency, Hong Kong Observatory chuan ruah sur hi darkar khata 158.1mm a tling tih sawiin, kum 1884 hnu lamah ruah a sur nasat ber ṭum a ni, a ti. Ruah sur nasa avang hian tuilian bawhawk thleng palh thei a ni a, mipuite chu fimkhur tur leh, an awmna hmunte tuiin a chim chuan hmun him lama insawn chhuak thuai turin an chah.

Hong Kong ramri, China chhim lam, Gaundong province-a Shenzhen khawpuiah pawh kum 1952 hnu lama ruah sur nasat ber ṭum a thleng bawk. China Meteorological Administration chuan Guangdong province-ah hian vawiin lam thlengin ruah nasa takin a sur dawn niin a sawi.