Morocco-ah lirnghing avanga thi 2,000 an chuang tawh

Morocco rama lirnghing avanga thi chu nimin thleng khan mi 2,000 chuang an ni tawh a, hliam tuar na zual mi 1,400 vel an awm bawk. Ruang hmuh belh zel a nih avangin thi zat pawh hi an la pun chhoh a rinawm.

King Mohammaed VI chuan an rama chhiatna rapthlak tak thleng avanga thite chu ram pumah ni thum chhung sun an ni dawn tih a puang. Public building-ah an hnam puanzar chu ni thum chhung a ngul chanvea zar a ni ang.

Kar liam ta Zirtawpni khan Morocco ram chhim lamah, Marrakesh leh a chhehvelah magnitude 6.8-a nain lir a nghing a, lirnghing hian chhiatna a thlen nasa hle. Epicenter hi Marrakesh chhim thlang lam, km 71 vela hla, High Atlas Mountains a ni. Lirnghing hi km 350 vela hla, an ram khawpui Rabat bakah Casablanca, Agadir leh Essaouira-ahte pawh an hria a ni.

Interior ministry chuan Al Haouz province chu lirnghing vanga thihna thlen tam berna a ni tih sawiin mi 1,293 an thi a, Taroudant province-in dawtin mi 452 an thi. Marrakesh-ah pawh thi eng emaw zat an awm bawk. In tam tak a chhia a, chenna nei loin kawtthlerahte mi tam tak an la khawsa mek a, ei leh in lamahte harsatna an tawk ṭan tawh a ni.

Zirtawpni zana lirnghing hi kum 100 chuang chhunga Morocco rama lirnghing na ber a ni a, kum 1960-a magnitude 6.7-a lir nghing avanga mi 12,000 chuang thihna a thlen hnuah lirnghing avanga chhiatna thlen nasat ber a ni bawk.

Ram leh pawl hrang hrang hruaitute chuan Morocco ram ṭanpui turin an inhuam thu an sawi tawh a, Israel defence minister Yaov Gallant chuan Israel sipaite chu Morrocco ram pan tura inpeih turin a hriattir. US preisdent Joe Biden pawhin Morocco mipuite ṭanpui turin an inpeih reng tih a sawi. Turkey, Spain, France leh Germany bakah ram dang ṭhahnem takin an puih tur thu an sawi.