Myanmar-ah Russia Su-30 fighter jet thawn thleng

Myanmar chuan Russia siam, Su-fighter jet a lei tur zinga pahnih chu a dawng tih trade minister Charlie Than chuan a sawi.

Russia leh Myanmar hian kum 2022, September thla khan Su-30SME fighter paruk leina tur hian contract an lo ziak tawh a ni.

Sukhoi Su-30sME multi-role fighter jet hi hmelmate beihna atan bik leh, pilot training-na atana duan a ni tih Russia arms exporter, Rosoboron export chuan a sawi.

Charlie Than chuan East Economic Forum-ah Russia nen hian thawh dunna tur inremna eng emaw zat an la ziak leh dawn niin a sawi a, heng zingah hian tourism tihhmasawnna tur pawh a tel. Hemi chungchang hi Russia defence minsitry lam erawh chuan a sawi lang duh lo thung.

US chuan civil sorkar paih thlatu, Myanmar sipaite thlawpah Russia hi puhin a lo vau fo tawh a ni. Myanmar sipaite'n civil mite laka beihpui an thlakna turah rualthuamte pawh supply ṭhinah Russia hi an puh a ni. Sipaite'n thuneihna an chan hnuah, Myanmar sipai hotu lu ber Min Aung Hlaing chu Russia ramah ṭum eng emaw zat a zin tawh a, Russia defence minister leh palaite pawhin Myanmar hi an lo tlawh tawh bawk.