France President-in Lebanon tan Donor conference a buatsaih

Lebanon khawpui, Beirut-a lawng chawlhna hmuna thil puakin chhiatna rapthlak tak a thlen avanga Lebanon chhawmdawl dan ngaihtuahin, France President Emmanuel Macron chuan Pathianni khan donor conference a huaihawt. 

Video-link donor conference buatsaih, President Macron kaihhruaiah hian ram 15 hruaitute an tel a, chhiatna rapthlak tak tuartu Lebanon mipuite leh sorkar ṭanpui leh chhawmdawl an ngaih thu te,  ṭanpuina pek te pawh rang tak leh lang tlang taka kalpui a ṭul thute an sawi. 

Donor-te chuan Lebanon mipuiten sorkar kalphung thlak tura an ngen leh an phutte sor­karin a ngaihthlak sak a, Lebanon sorkarin an indinthar lehna tura a hmalaknaah pawh hun rei zawk puih an inhuam thu pawh an sawilang a ni. 

President Macron-a office chuan he conference-a Lebanon puihna tura sum pek intiam hi US dollar maktaduai 297 zet a tlin thu a sawi. Ṭanpuina pe  tura intiamte hi European Union, UK, Germany, France, Spain, Switzerland, US, Qatar, Kuwait, Denmark leh Norway-te an ni. 

Beirut-a chhiatna thlenga thi hi mi 158 an ni a, mi dang 6,000 in hliam tuarin, chenna nei loin mi 3,00,000 vel an awm phah a ni. He chhiatna thlengin thil a tihchhiat hi US dollar tld 15 hu a tling nia chhut a ni bawk. 

United Nations chuan chhiat­na thlengin a nghawngte tuamhlawmna leh, infrastructure te din thar lehna tur hian USD maktaduai 100 tal a mamawh a ni dawn tih a sawi. Lebanon ram hian sum lamah harsatna a tawh mek lai niin, kum 1975-1990 civil war hnua an ram economy dinhmun a chhiat ber lai an tawng mek a ni.