Biden-a'n human rights chungchang Modi bulah a sawi chhuak

US president Joe Biden chuan India rama G-20 summit hmanga a kalnaah, India rama human rights dinhmun leh, press mite zalenna pek pawimawhziate chu India prime minister Narendra Modi bulah a sawi chhuak tih a tarlang.

Summit zawh fel a nih hma, Pathianni khan President Biden hian Vietnam tlawh turin India hi a chhuahsan a ni.

Narendra Modi-a rorelna hnuaiah, India rama human rights record a chhe chho hle niin activist leh rights group hrang hrangte chuan an lo sawi fo tawh a ni. Kum 2014-a Hindu nationalist BJP-in thuneihna a chan aṭangin, hnam leh sakhaw tlem zawkte'n beih an tawk fo niin an sawi a, mahse, he puhna hi India sorkar chuan a pha thung.

President Biden chuan Vietnam khawpui, Hanoi-a press conference a neihah India chungchang hi sawiin, Modi nen chuan India-US inlaichinna nghet zawk neih chhunzawm zelna tur pawh an sawi dun tih a tarlang. Hemi rual hian ram chak leh ṭhang duang tak siam turin mihringin dikna chanvo a neihte inzah tawnsak a pawimawhzia te, civil society pawimawhna leh press mite zalenna pek a ṭulziate pawh ka sawi chhuak bawk," tiin a sawi.

Reporters Without Borders (RSF)-in May thlaa World Press Freedom index a tihchhuahah, India ram chu nikuma a dinhmun aia 11 zetah tla hniamin, ram 180 zir chianna neihah 161-naah a awm a ni.