Morocco : Chhanchhuah hna thawk chhunzawm

Morocco rama lirnghing na takin chhiatna a thlen tuartute chhanchhuah leh zawn chhuah hna chu ngawrh taka thawh chhunzawm zel a ni.

Kar liam ta Zirtawpni zana magnitude 6.8-a naa Marrakesh chhimthlang lama lirnghing avanga thi zat report hi nimin thleng khan mi 2,122 an ni tawh. Hliam tuar tam tak awmin, heng mite chhanchhuah leh, lirnghing avanga in chimin a delhte zawn chhuah hna thawh mek a ni. Chhanchhuah hna thawhnaah hian Spain leh Britian search team-te'n an pui mek bawk.

Lirnghing hian Marrakesh-a mosque upa ber, kum zabi 12 hunlaia sak, Koutoubia Mosque a tichhia a, hei bakah old city hualtu red wall, UNESCO World Herigate site pawh a tichhe tel bawk. High Atlas Mountains-a Tinmel Mosque pawh a chhe tel a, he mosque hi North Africa leh Spain ram hnehtu, medieval dynasty sak a ni. Asni thingtlang khuaa in chu a chim deuh vek bawk a ni. Marrakesh hi Morocco rama khawpui lian ber zinga mi niin, tourist hub a ni a, khawpui chhunga in tam tak chu lirnghing hian a sawi chim a ni.

Spain, Britain, Qatar leh United Arab Emirats chuan Morocco ram pui tur hian search and rescue team te an tir a, ram dang tam tak pawhin ṭanpui an inhuam thu an sawi bawk. Tunisia chuan paramedic 50 bakah, chhanchhuah hna thawhna kawnga pui turin ui fingte a thawn a, Qatar ram chuan medical team an tir tawh bawk a ni. US pawhin disaster expert team bakah rescue specialist 60 leh ui fing pali a thawn.

Morocco sorkar chuan ram dangte puihna chu lawm taka a dawnsawn thu sawiin, sorkar chuan chhanchhuah hna thawhna kawngah theihtawp a chhuah reng a, mipuite pawh chiai lo turin a chah.

King Mohammed VI chuan lirnghing tuarte chhawmdawlna pekna kawnga chak zawka hma lak a nih theihna turin relief commission din turin thupek a tichhuak tawh bawk a ni.