Sri Lanka PM vawi lina ni turin Mahinda Rajapaksa lalut

Sri Lanka prime minister vawi lina ni turin Pathianni khan Mahinda Rajapaksa chu Kelaniya-a Buddhist temple, Rajamaha Viharaya-ah thu tiam tira lakluh a ni.

Mahinda Rajapaksa chuan an ram mipuiten an tana hnathawk thei tura an thlan tlin leh avangin lawm thu a sawi a, an ram mipuite chuan phurna leh ram tana hnathawk tura chakna an pek thu a sawi. PM atana lakluhna inkhawmah hian a unaupa, an ram president Gotabaya Rajapaksa pawh a tel. 

Election Commission chuan an rama health department-in guideline a siam zulzuiin inthlan hi August 5-ah khan a buatsaih a, kar liam ta Zirtawpni khan result puan niin, Sri Lanka Podujana Peramuna (SLPP) chuan hnehna an chang a, seat 225 awmah seat 145 an la a ni. Inthlana an chak vang hian India prime minister Narendra Modi chuan Mahinda Rajapaksa chu phone-a biain a lawmpui thu a hrilh a, Mahinda hian Modi chu thawhpui a tum thu leh India leh Sri Lanka chu inṭhianṭha tak a nih thu a sawi. 

Mahinda Rajapaksa hi Sri Lanka PM 13-na a ni a, kum 2004-2005 inkar khan PM a lo ni tawh a, kum 2018 khan PM atana thlan a ni leh a, nikum November khan PM atana ruat a ni leh bawk. August 9 khan PM vawi lina ni tura lakluh a ni leh ta a ni.