Russia-ah NKorea hotu Kim Jong-un a zin

North Korea ram hotu, Kim Jong-un chuan nimin khan Russia a thleng a, Russia president Vladimir Putin nen meeting neiin, ralthuam chungchanga inremna siam dan turte an sawi dun ang.

Kim Jong-un hi an ram sipai official, nuclear ralthuam leh ralthuam siamna factory lam enkawltute'n an ṭawiawm a ni.

North Korea official Korean Central News Agency chuan Kim hian Pathianni chawhnu lam khan rel hmangin Russia hi a pan tih a tarlang. Tun kar chhungin President Putin nen hian meeting an nei ang. Putin hi Vladivostok-ah Eastern Economic Forum hmangin a awm mek a, Kim nena meeting an neihna hmun tur tak hi sawi lan a ni lo.

US chuan kar liam ta khan Russia-in Ukraine ram a run meknaah a hman tur ralthuamte supply lo turin NKorea hi a lo vau tawh a, ralthuam a leitir a nih chuan a let a tuar ve ngei dawn tih a sawi. Mahse US vauna hi ngai pawimawh loin, Kim hian Russia ram hi a tlawh lui ta tho a ni.

Ukraine a run meknaah Russia hian ralthuam, a bikin North Korea aṭangin ammunition lei belh a duh a, hetih lai hian NKorea hian nuclear programme a kalpui avanga khawthlang ramte'n an hrek mek avangin ei leh in lama chhawmdawlna a mamawh hle bawk. Hei vang hian a sum mamawh phuhrukna turin a ralthuamte pawh hi Russia hnena, man to taka leitir a tum nia rin a ni. NKorea hi Russia-Ukraine indona thlen hnua langsar taka Russia ram a thlawpna lantirtu ram tlemte zinga mi a ni a, Putin pawhin NKorea nena an inlaichinna hi kawng hrang hranga tihngheh leh tihlen zel an tum thu a lo sawi tawh bawk.

Kim Jong-un hi ram pawn lamah a zin chhuak tam lo hle. Kum 12 ro a rel hnuah ram pawn lamah hian ṭum sarih chiah a la zin chhuak a, heng zingah hian ṭum li chu an ram ṭhianṭha, China ramah a kal a ni.